Weej wille gaer same mèt uch ’t Tegels dialek laevend haje en nag actiever oetdrage. Dit wille weej veural doon door in ’t Tegels te sjrieve en verhaole, gedichte en liedjes in ós dialek vas te legge en ten gehure te bringe. De vraog is of d’r interesse is vur eine Tegelse sjrieverskrink: ein gruupke Tegelse minse die ongevieër einen aovend per 4-6 waeke same kump, verhaole/gedichte op pepeer zet en óngerein veurdruuëg.
De sjoeënste kènne meugelik den ouch oetgebrach waere. Ós lid Truus Verbong zit al langer in eine regionale sjrieverskrink en wilt ós gaer op gang helpe. Haes-se interesse? Weej hure ’t gaer via info@hktegelen.nl. Beej genóg animo planne weej ein beejeinkóms öm de winse en ideje te verzamele en te kieke wat weej same kènne oppakke.