Terugblik cursus Tegels sjrieve

Vorige maand rondden tien cursisten de cursus ‘Tegels sjrieve’ met succes af. Ze kregen gedurende 8 maandagavonden les van Toine Ambaum in de grammatica en de rijke Tegelse woordenschat. Een van de cursisten, Mirian Janssen, schreef een mooi terugblik op de cursus.

 

Van de zomer kwaam d’r ’n berichje vurbeej op ’t Sjnoete Book.

D’r woort ‘ne cursus Tegels sjrieve gegaeve door meister Toine Ambaum. Ge weit waal dae waas vruger lieëraar aan de Aloysius sjoeël en houf van de Wambeke sjoeël in Tegele.

En dao heb ich mich vur opgegaeve!

Ich as Belvends maedje maar al 38 jaor woeënend op Sjteyl. Ich sjrief al jaore verjäördaagskaarte  en ouch eppjes in ’t plat.

Maar ich wól de juuste sjtripkes en puntjes op de juuste letters zette.

Dus 3 november zien we begós. Same mèt Angelique ’n twieëde Belvends maedje. En ich zal ’t uch nag sjterker vertèlle, det waas vruger mien buurmaedje.

Aevel ouch mèt Saske det thoes ABN sjprik ,dus det haet ’t döbbel zoeë zjwaor en daoröm haet ’t ouch twieë bukskes d’r beej : ’t roeëje en ’t brónsgreun.

Ouch Karin is jiddere waek van de partie en vingk ’t maar ’n gedoons of d’r nów waal of neet een sjtripke kump op de e.

Math is ‘nen echten Tegelse, dae haet gèn plank vur de kop ( det is volges öm ’n bruuedje aap verhaol), maar ’n plenkske mèt ziene naam d’r op.

En dao naeve zit John. Dae haet meistal waal get te vraoge. Maar ja, mèt vuuel Venlose vrinde en ’n Pruzin in bèd , kèn det ouch neet angers.

Hanny dao en taege haet femielie in angere dialek gebiede., wat zörg vur gedoons. Maar nów ’t geholpe is aan zien oug kump det allemaol wir good.

Mariska mien buurvrouw heej op rechs, det woort al nao twieë lesse as sjleutel persoeën aangeweze.

Det is netuurlik allein vur belangrieke minse wèggelag. Mariska sjrief al geregeld gedichjes vur Veldeke. Mien favoriete waord vur dich is: verroepzakke!

Aan miene linker kank zit Yvonne. Det maedje is van Duitse kóm aaf. Dao huuers se aevel gaar niks mieër van.

En den hebbe we nag Rogér, dae meister Toine nag kènt van vruger. En dae allein de ieërste les achteraan in de klas maagde zitte. En alle verdere lesse naeve de meister zoot.

Ich weit nów neet wat ich sjmaondessaoves mót gaon doon. As d’r aevel oeëts ‘ne vervolgcursus kump , sjrief ich mich sebiet wir in!

Mirian Janssen

 

Ook interesse in een cursus Tegels sjrieve? Kijk hier voor meer informatie.