Voorgedragen door Truus op 6 september 2020, tijdens de verwelkoming en zegening van de klok op de hoek Grotestraat-Spoorstraat. 

Oppe hook van de Sjpaorsjtraot en de Groëtesjtraot

Is d’r vendaag get sjôns te belaeve

Weej kômme heej met de Heem beejein

Öm ein officieel tintje aan de klok te gaeve

Wat good, det d’r heej nôw wir ein sjteit

Ein aje sjtationsklok sjtool iërs de show

Die is aevel al ein halve iëuw pleite

De äopening van ein nieje klok is nôw

Aaj minse kenne de verhaole van lang geleje

Al zittend op die bank met foto’s en mozaïek

Make ze gaer ein präotje euver vruger

Euver die plaetjes en de klok. Det is toch sjiek

Saoves is ‘t heej ech lekker bóete zitte

Taegen d’n duuster, zoë rônk half nege

As nemes nag zin haet öm te gaon pitte

Kenne ze heej vleermuuskes zeen vlege

Aventoe kiéke de luuj ömhoëg nao de klok

Wie vruug of wie laat det ‘t is gewaore

Ze hebben ‘t euver dae gôjje ajen tiéd

En dinke truuk aan de vervlaoge jaore

Wie ich as jônk Belvends maedje op páad ging

Heej in Tegele met eine groëte Tegelse blaag

Zagte mien elders: “Dink d’r aan. Op tiéd nao hóes!

Öm twelf oor begint eine niejen dáag!”

Toen dôch ich: “Die tikke neet richtig

‘t Kump zich toch neet op ein oor!”

Weej ammezeerden ôs heej köstelik

Det ‘t later woort, hadde weej gaarneet door

Nôw weit ich waoröm: ömdet d’r toen gen klok sjting!

Maar good, det die heej wir is kômme te sjtaon

‘t Zal leuk zien as die jônge van twiëdóezendtwintig

Zich heej iërs zéen vurdet ze oppe joets gaon

Gister huërde ich nag ein meuderke zegke

(Det leep heej met zôn debberke vurbeej)

“Ich kôm dich haole as de groëte baovenaan sjteit

En de kleine wiézer dao op det sjtripke van de dreej”

Zoë zuusse det idderein d’r plezeer van ken hebbe

Det heej ein bank en die sjoëne klok is gemak

‘t Is ein aanwins vur ‘t sjtraotbeeld van Tegele

Wat good det de Heemkunde det haet opgepak

Truus Verbong-Simons

Tegele, 6-9-2020

Geef een reactie

Uw e-mailadres wordt niet gepubliceerd. Velden met een sterretje zijn vereist *

Velden wissenVerzenden